2017 թ. սեպտեմբերի 13-15-ը Հայաստանի Հանրապետության մայրաքաղաք Երևանում և Արցախի Հանրապետության մայրաքաղաք Ստեփանակերտում ունեցավ Կուրորտաբանության և ֆիզիկական բժշկության գիտահետազոտական ինստիտուտի կողմից պարբերաբար կազմակերպվող “Ռեաբիլիտացիայի ժամանակակից տեսակետները բժշկության մեջ” խորագրով 8-րդ միջազգային գիտաժողովը:
ԳԻՏԱԺՈՂՈՎԻ ԿԱԶՄԱԿԵՐՊԻՉՆԵՐ
ՀՀ Առողջապահության նախարարություն
ԼՂՀ Առողջապահության նախարարություն
ՀՀ Կուրորտաբանության և ֆիզիկական բժշկության գիտահետազոտական ինստիտուտ
ՌԴ Բժշկա-տեխնիկական գիտությունների ակադեմիա
Մ. Հերացու անվան Երևանի Պետական Բժշկական համալսարան
ՌԴ ԱՆ Բժշկական ռեաբիլիտացիայի և կուրորտաբանության ՌԳԿ
ՌԴ Վերականգնողական բժշկության մասնագետների ասոցիացիա (ԱՍՎՈՄԵԴ)
Հայաստանի բալնեոլոգների և կուրորտաբանների ասոցիացիա
ՆԱԽԱԳԱՀ
Լ.Ն. Ալթունյան — Հայաստանի Հանրապետության Առողջապահության նախարար
ՀԱՄԱՆԱԽԱԳԱՀՆԵՐ
Բ. Ն. Հարությունյան — Կուրորտաբանության և ֆիզիկական բժշկության ԳՀԻ տնօրեն
Կ.Ն. Աթայան — ԼՂՀ առողջապահության նախարար
Բ. Ի. Լեոնով — ՌԴ Բժշկատեխնիկական գիտությունների ակադեմիայի նախագահ
Ա.Գ.Սահակյան – ՀՀ կառավարությանն առընթեր պետական գույքի կառավարման վարչության պետ
Ն.Ա.Ստարցևա — ՌԴ ԱՆ Կուրորտաբանության և Բժշկական ռեաբիլիտացիայի ՌԳԿ տնօրեն
Ա.Ա. Մուրադյան — Մ. Հերացու անվան Երևանի Պետական Բժշկական համալսարանի ռեկտոր
ԸՆԴՀԱՆՈՒՐ ՏԵՂԵԿԱՏՎՈՒԹՅՈՒՆ
Անցկացման վայրը. Երևան-Ստեփանակերտ, 2017 թ. սեպտեմբերի 13-15:
Գիտաժողովի հանդիսավոր բացումը տեղի է ունեցել սեպտեմբերի 13-ին ժամը 10.00-ին Երևանի “Անի Պլազա” հյուրանոցի Նաիրի կոնֆերենց սրահում:
Գիտաժողովի հանդիսավոր փակումը տեղի է ունեցել սեպտեմբերի 14-ին ժամը 20.00-ին Ստեփանակերտի “Վալեքս Գարդեն” հյուրանոցի կոնֆերենց սրահում:
Գիտաժողովին մասնակցել են 100-ից ավել բարձրաստիճան և ճանաչված մասնագետներ ինչպես Հայաստանից և Արցախից, այնպես էլ ԱՊՀ և արտերկրներից (Կորեա, Չեխիա, Իզրայել, Ռուսաստան, Ուկրաինա, Բելառուս, Վրաստան, Տաջիկստան և այլն):
Գիտաժողովի թեմատիկան նվիրված էր վերականգնողական և էկոլոգիական բժշկության ժամանակակից ուղղություններին, ռեաբիլիտացիայի արդիականացման և զարգացման տեսակետներին, կանխարգելիչ բժշկությանը, կուրորտային ծառայության ընդարձակման և արդիականացման ճանապարհներին, բուժական զբոսաշրջության զարգացման սկզբունքներին, կյանքի որակի բարելավման ուղղություններին և այլն:
Բացման խոսքով հանդես է եկել ՀՀ «Կուրորտաբանության և ֆիզիկական բժշկության գիտահետազոտական ինստիտուտի» տնօրեն, Մ. Հերացու անվան ԵՊԲՀ ռեաբիլիտալոգիայի, ֆիզիոթերապիայի և սպորտային բժշկության ամբիոնի վարիչ, բժշկական գիտությունների դոկտոր, պրոֆեսոր, գիտաժողովի համանախագահ Բենիկ Հարությունյանը, ով ողջունելով մասնակիցներին բարի երթ է մաղթել գիտաժողովի աշխատանքներին:
Բացման արարողությանը ողջույնի խոսքով հանդես են եկել ՀՀ առողաջապահության նախարարարության, ՀՀ կառավարությանն առընթեր պետական գույքի կառավարման վարչության, ՌԴ բժշկատեխնիկական գիտությունների Ակադեմիայի, Հայաստանի, Ռուսաստանի և այլ արտերկրների գիտաառողջապահական կազմակերպությունների ղեկավարներ և ներկայացուցիչներ:
Գիտաժողովի առաջին օրը` լիագումար և սիմպոզիալ նիստերին ելույթ են ունեցել 25-ից ավել մասնակիցներ, որոնց զեկույցները նվիրված էին վերականգնողական բժշկության տարբեր ճյուղերի արդի խնդիրներին, դրանց լուծման առաջարկներին ու դիրքորոշումներին:
«Ռեաբիլիտացիայի ժամանակակից տեսակետները բժշկության մեջ» խորագրով Երևանում մեկնարկած 8-րդ միջազգային գիտաժողովի աշխատանքները սեպտեմբերի 14-ին և 15-ին շարունակվել են Արցախում: Գիտաժողովի մասնակիցներին ողջունել է Արցախի Հանրապետության առողջապահության նախարարի պաշտոնակատար Կարինե Աթայանը` իր երախտագիտությունը հայտնելով կազմակերպիչներին գիտաժողովի աշխատանքներում Արցախի ընդգրկման համար:
Գիտաժողովի համանախագահ Բենիկ Հարությունյանը իր հերթին ողջունել է մասնակիցներին և շեշտել, որ Կուրորտաբանության և ֆիզիկական բժշկության ԳՀԻ կողմից պարբերաբար կազմակերպվող միջազգային գիտաժողովները ձեռք են բերել մեծ հեղինակություն, որոնց մշտապես մասնակցում են վերականգնողական բժշկության ոլորտի աշխարհի տարբեր երկրների ճանաչված գիտնականներ: Բենիկ Հարությունյանը պատրաստակամություն է հայտնել այսուհետ նման գիտաժողովներին ներառել նաև Արցախը:
Գիտաժողովի պատվիրակները Արցախի Հանրապետության առողջապահության նախարար Կարինե Աթայանի ուղեկցությամբ այցելել են Հանարապետական բժշկական կենտրոն, ծանոթացել են նաև նորակառույց Ուռուցքաբանական դիսպանսերի պայմաններին և առկա խնդիրներին:
Ստեփանակերտ այցի շրջանակներում հանդիպում է կայացել Արցախի Հանրապետության Նախագահ Բակո Սահակյանի հետ, որին ներկա են եղել Արցախի Հանրապետության առողջապահության նախարար Կարինե Աթայանը, Կուրորտաբանության և ֆիզիկական բժշկության ԳՀԻ տնօրեն, ՌԴ Բժշկատեխնիկական գիտությունների ակադեմիայի Հայաստանյան մասնաճյուղի նախագահ Բենիկ Հարությունյանը, ՌԴ Բժշկատեխնիկական գիտությունների ակադեմիայի փոխնախագահ Մառլեն Բոստանջյանը, Մոսկվայի առողջապահության գլխավոր ռեաբիլիտոլոգ, Բժշկական ռեաբիլտացիայի, վերականգնողական և սպորտային բժշկության Մոսկվայի ԳԳԿ տնօրեն բ.գ.դ., պրոֆ. Իրենա Պոգոնչենկովան, Հարավային Կորեայի Սոգյոնի Համալսարանի պրոֆեսոր Կիեջին Լին: Հանդիպման ժամանակ քննարկվել է ՌԴ ԲՏԳԱ Արցախյան մասնաճյուղի բացման գաղափարը, որը հավանության է արժանացել ԱՀ Նախագահ Բակո Սահակյանի կողմից:
Քննարկվել են նաև առողջապահական ոլորտին, գիտաբժշկական համագործակցությանը և համատեղ իրականացվելիք գիտահետազոտական աշխատանքներին վերաբերվող կարևորագույն հարցեր:
Արցախի Հանրապետության այցի շրջանակներում հյուրերը այցելել են Դադիվանքի, Գանձասարի, Շուշիի և Տաթևի եկեղեցիներ, Ստեփանակերտի պետական թանգարան, ծանոթացել Հայաստանի և Արցախի մշակույթային և հոգևոր կենտրոնների, ավանդույթների, սովորույթների և պատմության հետ:
Գիտաժողովը անցել է բարձր գիտական և կազմակերպչական մակարդակով, ստեղծագործական միջավայրում: Մասնակիցների կարծիքով նման շփումները մեծ դերակատարություն կունենան ոլորտի հետագա զարգացման համար: